helenblog

搪著二姨--思念阿母 1. 成十年前（？）佇俊傑外媽告別式拄著二姨，聽伊講誠濟我細漢的代誌，我驚一大tio5。原來，阿母知影 足濟代誌，大人無講話，並無代表in毋知。 2. 逐擺，搪著母舅親情，倍感親切。毋過，逐家一人一家代，逐家無閒士農工商，攏毋捌相揣，干焦婚喪場 合才有見面講寡話。 3. 其實，活甲今，是按怎對母舅、阿姨的感情遮爾深厚，我想，（細漢）阿母捌tshua7我去牛挑灣有淡薄仔關 係，不而過，彼陣猶未讀冊，傷細漢袂記得足濟細節，干焦有kho2-tsut-tsut的親情化袂開。 4. 讀國中的時，拄考第一次月考，逐e5人攏捎無tsang2，毋知第二名黃淑貞是佗一口灶的gin2仔？聽二姨講 起，這馬想起來，既然阿母攏知影，第一名是李雅惠，伊是大兄的老師李魁一老師的千金；第三名許二月 的阿爸許老師因為早已經過身，逐家較毋知，毋過，阿母知影。（因為許老師是牛挑灣人。）

過年--思念阿媽 1. 過年大漢姑仔tshua7 gin2仔轉來，有一冬過年，阿媽炊三床kue2。 2. 細漢頻若過年過節，阿媽逐項攏有做甲夠，尤其年節著祭祖拜神，親像冬節so圓、做牽仔、做菜包，過年 tshue-kue2，五日節縛肉粽，閣愛thai5雞、煎魚仔…。 3. 厝裡田園濟，大人規年thang3天攏佇園裡無閒，拄著收成落種阿媽愛款點心佮煮中畫頓予鬥做工課的跤手； 愛thuh秧仔、擔秧仔、割牛草、牽牛仔食青草。厝內阿媽gau5做工課，會使講是阿公的超級秘書，嘛足成 佇大飯店的總經理，園裡抑是厝內查某人工課，逐項都做甲to-to-tiap-tiap。 4. 有一擺過年，大漢阿姑tshua7 gin2仔轉來，（逐冬in攏愛轉來探墓。）細漢gin2仔當咧大，佇厝裡空 間大，日時，大漢姪兒（俊穎、俊超）會tshua7 in四界tshit-tho5，去釣魚，去拍球，去騎鐵馬，耍 tshu7-枋，暝時紲thuann守佇眠床耍牌仔khioh紅點仔。一工、兩工、三、四工時間一直走，大人嘛無閒 出去行春，遮的gin2仔三姑情四姑情才足毋甘願離開。 5. 彼冬過年阿媽攏總炊三床kue2，逐家有食閣有掠，聽講阿姑的gin2仔佇半路一直吵欲翻頭轉來揣大漢姪兒 做伙耍。（gin2仔人欲罷不能啊。）

阿媽佮我講一e5大漢姑的故事 1. 阿媽講，大漢姑仔自細漢就誠巧性閣貼心（阿母講的），會曉知影二嫂食無飽，伊閣吩咐阿媽講飯愛加煮寡。 2. 我有兩e5阿姑，大漢姑咧賣豬肉，伊共人客的電話號番攏記佇頭殼。大漢姑丈呵lo2講，娶某就愛娶像大漢 姑這款，頭殼好，個性好，gau5做工課。 3. 2018年6月（我咧學期期末），經過10年來失智，中風病疼纏綴，阿爸予佛祖tshua7轉去。會記得火化彼工， 大漢阿姑講起買工業區邊彼塊田園，「我一直賣豬肉，兩三工就共錢額窮窮咧，去還銀行。一千外萬攏是我一 直趁一直窮，喙齒根咬an5才還了的。」阮三e5阿兄攏有提200萬相添買厝，小妹佮我嘛攏有100萬。已經過 了20，30冬的代誌聽阿姑講起，你講阮阿姑是毋是足厲害。 4. 阿媽捌講大漢姑仔細漢佮大人做工課，轉來厝，共阿媽交代講，愛加煮寡飯，二嫂（我的阿母）若像食無飽 呢。阿媽閣共話傳予阿母，阿母就講「大漢姑仔會tiak我的腹肚，知影我腹肚iau，食無飽。」 5. 人講姑疼孫仝姓，大漢姑仔gau5做穡，個性溫馴，足疼阮遮的阿孫仔。

鴨母寮故事7--啥是細姨生的？（請二兄校正、補充四叔佮五叔的學歷，謝謝。） 1. 阿媽生五男二女。第三阿叔黃清河著瘧疾（Malaria）10歲就過身。聽阿媽講三叔曲去的時陣，in老師足 毋甘有來共拈香。老師講三叔毋但足巧閣捌代誌。阿媽講伊欲死進前，阿媽tshua7去樸仔跤予先生看，伊 閣煩惱細漢小弟（五叔仔）無人顧欲按怎？ 2. 阿伯自細漢讀冊閣佇外口食頭路，四叔仔東農（？）出業了佇吳厝做生理頭殼較有變竅。 3. 阿爸（二叔仔）自細漢留佇阿公身軀邊作穡，阿公gau5拍算，先共阿母娶入門鬥做工課，阿爸才去做兵。阿 媽驚做兵危險下願阿爸平安轉來就食長年的早齋。 4. 阿爸火hu性，捌因為園裡潑水灌溉的代誌佮隔田過庄人起衝突。雖然是外庄人壓霸毋著，從此，阿爸煞予人 點痣做記號矣。 5. 五嬸問阿母，二嫂，二叔佮明仔（五叔仔偏名）敢（有影）是細漢生的？

鴨母寮故事6--厝裡分食（1970左右） 1. 五歲分食進前，我干焦有足淺的記持。 2. 五嬸仔轉外家就會kuann7果子來，我自細漢就有食過林puat8林的愛文，suainn7仔厚汁，彼陣細漢猶 袂曉得，見若食著都沐甲規身軀。 3. 四嬸、五嬸攏tua3佇厝裡，毋過四叔仔佇吳厝賣農藥（開店賣農藥，閣tshing3人咧共人tshu7農藥。） 五叔仔佇內山教冊，無常在轉來。猶會記得阿瓊細漢有『起床氣』透早就張咧起性地，有時閣會聽著咧 嘛嘛吼。不而過，阿瓊大漢了膽頭足在的。 4. 四叔仔in阿輝較大漢我，伊會共細漢阿兄耍，我較有印象。五嬸上大漢後生阿強（志強）減我兩三歲， 我較袂記得矣。 5. 這馬二兄in咧睏的房間原來是khng3粟仔的倉庫，分食了嘛閣用一陣，聽候娶二嫂入門才變新娘房。

阿母講：“阮家己來生。” 1. 大姨來共小表姊tshua7轉去。 2. 我的名本來叫“淑貞”，佮大姨in大漢查某囝仝名，聽講 是希望我和大表姊仝款gau5讀冊做老師。 3. 毋過，佇我出世進前，猶有一e5故事。 4. 我出世細漢兄哥已經六，七歲，（中央這站聽候，曾經 抱一e5大姨兜的細漢表姊來飼！伊干焦大我一兩歲爾。） 5. 這是和二兄去共大姨拈香才知的。大姨兜就佇我的母校 --嘉義女中後門巷弄，崇文街時，聽這e5表姊講出 來的。 6. 我想，時間應該無偌長，主要是城市內的gin2仔 欲哪會慣勢庄跤的生活款，大人不時都無佇咧，厝 裡放空城，隨時愛家己揣耍的，全然毋是佇市內大 人有管較的款大不相同。 7. 聽表姊講，大姨欲共伊tshua7轉去彼當時，阿母講一 句話，“無愛，阮家己來生。”神奇的是，隔年我就迸 出來矣，哈哈。

我佇針車跤khioh著錢 1. 過去拾元面額鈔票印刷色水是紅的，sui2-sui2，毋 知逐家猶有印象無？ 2. 我差大兄十歲。讀高年級雞兔同籠數學題是伊教的。 3. 代誌發生（敢是）佇伊讀高中，我讀小學無外久。捌看 過大兄佇阿母的針車頂做功課。（阿爸房間倚門口埕的 窗仔邊）阿兄無細膩落三、四張拾箍元的銀票。 4. 毋知別人兜的gin2仔有所費通買四秀仔無，阮兜無。 5. 我peh thuah門橫杆偷提烏藥丸食，趁阿母睏中晝 偷nih看皮包內底有零星通tiuh一兩角無？提去店仔 抽抑是買啖sam2食，四界khioh銅管仔換麥芽，趁雨 縫khioh露螺去賣，為著這e5永遠都that袂滇的喙空 ，無所不至。中晝和細漢兄哥去割草（予牛食）趁人睏 中晝挽puat8仔，（有時陣khioh露螺，經過人的果子 園嘛會順手牽羊，看著就共挽來食。） 6. 講著細漢哪會遐枵鬼，彼三，四張銀票袂記得用幾張去 換四秀仔食了！（阿母尾仔有問khiat仔--黃尋in某 才知。）

細漢阿兄共阿公拭車仔 1. 細漢阿兄真有個性。譬如講，伊會趁阿伯tshua7大堂哥 大堂姊回嘉義tshua7in做伙去園裡耍。 2. 較大面的狀況是愛鬥做工課，黃昏暗，伊著共牛仔做火薰 ，彼陣猶無掠bang2的燈火，所以逐家不時都予火薰薰 甲目睭pah袂開。 3. 牛仔欲入去牛牢，愛牽去“喝尿”。不而過，我嘛會記得 阿兄透早無閒咧燥火hu，彼是牛仔喝傷濟水抑是暗時仔 無放尿，暝時tshua7尿佇牛牢啦！彼工阿兄若無較猛 掠咧，百面是會遲到去予老師處罰。 4. 阿兄閣有一e5足肥的外路仔--共阿公拭車仔。阿公的 跤踏車毋是全新的，毋過阿公足惜略的。（這段故事要 請二哥補充，是有關阿媽外家大糠榔大舅公的。）逐 擺阿兄車仔拭好，攏有現金通領，伊嘛會買好料的請我 ，猶會記得有塗豆糖，麥芽糖、、、。

小妹猶細漢--思念阿母 1. 小妹在辰時出生，伊相牛。額頭稍窄，較勞心勞力。 不過，話說回來，在父親病榻期間，或平日裡穿梭在 工課，家庭和板橋樹林之間的人情陪綴，伊真照起工。 2. 小妹出世，我拄好欲讀小學。有一次厝裡毋知是收成抑 落種無閒，阿媽著煮點心tshuan5牛草，若是播田插秧 ，thuh秧仔（用小鏟子一塊塊將秧苗鏟起，予播田者 插秧仔。） 3. 可能崁前庄的姨婆嘛咧無閒，小妹照顧煞輪到我。我共 小妹ainn7去教室，老師有提一條椅仔予伊坐，我嘛拜 託伊愛乖，愛聽話。 4. 還有一遍中晝，小妹那驚著那吼，有夠嘈人。好佳哉阿 母佇厝，趕緊處理伊頭殼空喙。猶會記得我口氣bai2 ，阿母講，“小妹猶細漢袂曉得。” 5. 回首往事前塵，過去gin2仔大多數攏野放在外據 在 in四界“拋拋走”，序大人無一時閒。 6. 照顧小妹會較累，毋過，這馬共想倒轉來，伊並我 較捌世事，加足gau5處理代誌。

二兄討欲食冰 1. 細漢足愛去敏菊（同窗）in兜耍，in阿兄阿姊較大漢 ，in兜有果子園，厝頭前有蓮霧，有龍眼，棗仔、、、 按怎食都食袂完的果子。in園裡的龍眼tsang5閣有飼 蜂，嘛有足濟tsang5puat8仔。 2. 上siann5人是，in兜熱人攏有做“凍凍果”（冰袋甜點） 佮足濟好食物，in兜電視嘛是看thang3海的，（捌聽 講以前足濟人giah8椅條仔去看電視。）敏菊in阿姊 （敏雀）攏看西洋片，毋過我攏看無。 3. 無偌久，猶會記得是小學的時，厝裡就有冰箱，就 會當家己做冰，毋免閣看人食。 4. 捌聽二兄講伊細漢的時就無通遮好運。共阿公鬥牽牛， 拄著天氣鬱熱，討欲食冰，今仔日，阿公講，監囚！早 起才食過爾。阿兄毋死心，明仔載閣討，阿公煞應講， 連鞭就欲食暗矣，食啥物冰？ 5. 阿媽捌學阿公的話尾講，“規厝間人，喙齒kha3 -kha3規米籃！”食指浩繁啊。

我予阿母罵三八 1. 毋知逐家會驚予爸母罵無？ 2. 有一次，我予阿母罵“三八啊！”後，內心確實忿忿難平。 3. 代誌發生在小學讀五年時，老師教阮“一代khok(酷刑 ，節儉)，二代樂，三代giah8柺仔khok-khok -khok。”（意思是講第一代披荊斬棘，含辛茹苦，“儉 腸凹肚”，第二代逍遙樂天，儘情花費，到了第三代“三 代窮空”，只能乞討求生。） 4. 可能是台語俗諺順口溜說起來真“心適”，嘛是細漢傷“ 白目”，不了解“禍從口出”，所謂“飯會使隨便食，話 毋通亂講。”記憶所及，母親總能抓住機會，教訓一番。 5. 事過境遷，現在想起來，阿母的教誨仍令我摒息戒慎 。回首前塵，母親雖早早離世，子女照顧等生活 經濟未曾匱乏，除了祖父母的付出和用心，阿母自己嘛 留有一分外地分予我和小妹，所謂為母則強，所言甚是。

巧新婦--思念阿母 1. 捌聽細漢阿姑講，阿公本成誠疼阿母這e5巧新婦。毋過 ，這佮我目睭看著的哪會無仝款。 2. 阿母雖然冊讀無濟，不而過伊的頭殼巧性，自細漢讀公 學校就是刺甲出名的查某王。這是細漢姑仔聽著載番薯 來賣的牛挑灣庄的人咧講的。 3. 是按怎阿母這e5巧新婦煞變款，予阿公疼袂入心？這愛 對阿爸這pinn5講起。 4. 自我出世阿爸就足骨力拍拚，無疑悟，我讀小學六，七 歲的時，阿爸煞開始變款。khia7算是阿爸40外歲做農 事小組長，彼當陣各鄉鎮的水利所權利獨占，所致分水 番的水單小組長嘛算是有淡薄仔行情的。 5. 這e5坎站阿爸嘛會佮人喝拳lim酒，厝裡有一點仔田塗 ，燒酒伴就會共阿爸使弄，講，清仔（阿爸的名）做甲 流汗，煞予人嫌甲流瀾。怪就怪阿爸耳空輕，袂堪得別 人一直共tsng，嘛是按呢，阿爸佇厝裡愈無地位。

阿爸足在膽--思念阿爸 1. 阿媽共我講一e5阿爸細漢的故事。 2. 阿媽講，阿爸細漢愛綴路，有一改綴去水利所。阿媽那 講那笑，lin2阿爸看著“金九仔”的狗仔古錐，就佮伊 耍袂煞。大人咧無閒，lin2阿爸嘛無閒咧耍，攏袂驚 生份。 3. 阿媽講，伊佇邊仔，那看那驚，煩惱這e5gin2仔袂 曉得，毋知主人家是熊抑是虎，攏袂驚人受氣。講啊講 ，阿媽閣講，有聽著lin2阿公講，進前無偌久有掠一 隻雞去予金九仔，按呢阿媽就較安心啊。 4. 阿爸自細漢十外歲仔，拄著寒熱仔，好去了後，講話就 較頇顢，毋過，伊做工課猛醒，伊駛牛猛掠的款是通人 呵lo2。厝裡濟園，若毋是阿爸gau5駛牛，欲按怎趕會 著播田的節氣。 5. 作穡人溫馴袂計較，阿爸對待兄弟姊妹的感情是若豆腐 彼款，厚閣軟軟。雖罔工課做了咧累有時喙裡會nauh 兩句，不而過，彼攏是喙裡講講咧爾爾，講過就煞 煞去矣。

若看著鴨母寮彼tsang5榕仔--思念阿公 1. 查埔祖黃豹--阿公的老爸，早早就予神明掠去做仙，阿公9歲就去南勢竹厝共in阿舅鬥牽牛。 2. 黃豹查埔祖是佇一擺駛牛車，車頂的物件繚無好勢，規e5人對牛車頂抨落來一命嗚呼。 3. 進前閣聽講做乩童的查埔祖有一改予神明處罰，規粒頭殼nng3入去桌杆內底。 4. 查某祖陳市落尾thng7小叔（黃朝枝？閣有生叔公、姑婆。？） 5. 陳市是南勢竹來的，查埔祖過身了後，阿公9歲，就去共阿舅牽牛。聽阿媽講，細漢猶袂曉得，若拄著無乖 予阿舅修理，阿公目屎那流那相遠遠彼tsang5榕仔。 6. 鴨母寮庄頭榕仔足大足老，有一擺樹tsang5破病逐家參詳欲tsho3起來，閣問阿公，阿公講留咧。足尾手 實在無法度矣，才規tsang5總tsho3。

阿公的超級祕書--思念阿媽 1. 頭前「北港興外庄」阿公佮阿媽同時共kua3耙借人的故事，兩e5人佇新婚（一段期間）新茶鈷新烘爐， 有一段痛苦的磨合期，可見兩人的個性攏有剛烈的一面。 2. 話講倒轉來，阿公佇外口欲佮人khia7起首重信用，一言既出，駟馬難追。阿媽毋知阿公已經共家私允人， 而且閣有阿祖鬥主意，伊（阿媽）想講妥當，哪知會發生一隻牛起雙領皮的巧合，論真，當時雙方若各退一 步好好的講，家庭暴力（是毋是）會當莫發生。 3. （人講）個性決定運命。（khia7）算阿公阿媽勤閣儉，阿公會拍算，阿媽gau5做工課，（大概是）阿爸娶阿 母入門的彼e5跤兜，（阿公50歲左右）佇厝裡就做六甲穡仔。 4. 隔壁溪水叔公仔細漢就予好額人做後生，阿媽捌聽in（序大）講，後擺娶某生孫，一人欲分一甲當，阿媽 心肝內暗想，阮兜愛拚偌久才有這號光景？

百歲人瑞--阿媽的養生之道 1. 這馬，一四界生產的果子攏tau3甜的。美國的葡萄、甜李仔、日本的富有柿、蘋果、台灣的棗仔、柑仔、 西瓜、蓮霧、puat8仔、閣有suainn7仔。 2. 我細漢猶未讀冊，五嬸仔若轉外家常在攏會kuann7 suainn7仔來。會記得伊真有分張，知影阮這陣gin2仔 足iau-sai5，阮逐家攏一人ge3一粒，不止仔大粒的愛文呢。 3. 五嬸仔的外家佇林puat8林，種真濟果子，suainn7仔是大宗。細漢gin2仔猶袂曉愛那ge3那suh汁, 果汁 那ge3那津，津甲規領衫。（khia7算是1970年代，不是土suainn7仔喔，是甜but-but芳芳芳閣厚汁的愛文。 4. 會使講阮遮陣gin2仔自細漢就會曉食愛文的芳氣佮幼膩的肉質。 5. 想像一下，一群大大細細的gin2仔khia7佇門口食suainn7仔的畫面，食著甜but-but閣芳貢貢的suainn7仔 彼款滿足的滋味。毋過，五嬸煞講，阿媽足khiunn7喙，無食suainn7仔。

肚臍thoo2-thoo2欲娶某，肚臍深深欲佇金-- 思念阿公 1. 雖然庄內逐家攏知影阿公是勤儉出名的。 2. 毋過，我細漢捌提到阿公的銀角仔呢。 3. 毋是生做古錐，毋是好喙有人緣。看起來頭殼khiang-khiang閣恬tsinn-tsinn，哪有這號好空的？ 彼是我的肚臍thoo2-thoo2會當thng3銀角仔。 4. 較早做gin2仔的時，有叔伯（四叔仔佮五叔仔）的堂的兄弟姊妹做伙耍，不止仔鬧熱！一陣gin2仔圍佇阿 公的身軀邊，閣phian2衫仔，肚臍看現現，阿公就提銀角一e5一e5khng3，一e5落二e5落，落尾，輪到我 的番仔，阿公一下仔就khng3起去。 5. 是按怎細漢的時我的肚臍遐爾thoo2？（抑是轉臍剪了較長？）

婦德--懷念阿媽 張寶（1910~2011） 大伯父（1932~ ） 父親（1934~2018）故事發生在阿媽25歲左右。 故事發生佇伸手間仔食飯時。 照阿媽講的，時間應該是阿公阿媽新婚無偌久。阿伯抑是阿爸猶ainn7佇身軀。極加是結婚兩三冬的時陣。（略略仔）敢是才生阿伯，按呢，正港才新婚呢。 食飯的時陣，阿祖嘛在場。阿媽講，概tang5借予某mih人矣。今，這聲piang3矣！阿公（心肝內）想講伊早就允人矣！人講允人較慘欠人。阿公無講，阿媽借人（閣）無先參詳，阿祖佇邊仔嘛無衛啥人。講時遲，彼時快，少年的阿媽早就予阿公壓佇塗跤兜拍一下半小死矣。 你想看覓咧，是按怎阿公聽著阿媽講的話，一下仔就氣甲心狂火著？閣出手遐爾雄共阿媽拍甲規e5面腫uainn-uainn？是阿媽應一句「我就毋是北港媽興外庄。」（意思是阿媽無北港媽祖靈聖，哪會知影物件（概tang5）借人矣。） 少年時代的阿媽，心肝頭的艱苦無地thau2，拍算gin2仔ainn7咧卻轉外家投（序大人），佇路頭看著阿母（阿媽的母親）目屎擒咧，啥物就無講。

懷念父親 阿爸（你害矣）睏一下傷晏 阿爸捌佇新莊tua3五、六冬。 伊透早食飽，就去seh菜市仔，行到四維路尾就到活動中心，伊逐工攏來遮報到。有一擺我閒閒綴去查勤，有 影呢，khia7遠遠就有看到一e5穿插pih紮坐挺挺，看人行棋足注神的阿爸。 阿爸佇庄跤無聊就愛去店仔頭行棋抑是看人奕。佇新莊，我嘛毋知伊有奕無，干焦知影伊不時nah講，遐的人奕 棋子奕牌仔攏有輸贏，伊閣講耍牌仔跋kiau2會去邊仔提錢，掩人耳目。 阿爸seh街嘛會買寡四秀仔罔啖sam2。伊去到佗位就愛佮人破豆開講兩句，一回生二回熟，逐家就呵lo2伊是「 六甲伯仔」。 聽阿爸講伊少年有一擺睏傷晏，欲牽牛去駛，佇半中途予阿公sang著，阿公看著，心光火著，就喊講，「啥人路啊，牛仔牽轉去。」 阿爸驚一下，三伐做兩伐，趕緊去園裡。

烏藥丸--思念阿母 鴨母寮厝裡，除甲新起的伸手無算，總共閣有四間，總舖房間攏有設thuah門。 毋過，這尾手thuah門咧換新布的時，哪有一間thuah門的橫杆減幾偌支橫杆咧？ 講著阿爸這間thuah門的橫杆無去，就想著過去做gin2仔的時就不時咧腹肚枵, gin2仔人誠通光，知影房間壁頂有烏藥丸。 別人有糖含仔，我（細漢）食烏藥丸相拄。伊略仔苦甘苦甘，哺著袂輸軟糖仔。 細漢提袂著，毋才跤踏thuah門的橫杆爬起去偷me藥丸。一擺兩擺…橫杆斷了一支閣一支。 序大人無閒做工課，轉來到厝款好食飽就已經是會呼雞袂pun火矣，實在管袂著我這e5 枵鬼gin2仔，不時就枵hoo3-hoo3。