阿爸（你害矣）睏一下傷晏

懷念父親 阿爸（你害矣）睏一下傷晏 阿爸捌佇新莊tua3五、六冬。 伊透早食飽，就去seh菜市仔，行到四維路尾就到活動中心，伊逐工攏來遮報到。有一擺我閒閒綴去查勤，有 影呢，khia7遠遠就有看到一e5穿插pih紮坐挺挺，看人行棋足注神的阿爸。 阿爸佇庄跤無聊就愛去店仔頭行棋抑是看人奕。佇新莊，我嘛毋知伊有奕無，干焦知影伊不時nah講，遐的人奕 棋子奕牌仔攏有輸贏，伊閣講耍牌仔跋kiau2會去邊仔提錢，掩人耳目。 阿爸seh街嘛會買寡四秀仔罔啖sam2。伊去到佗位就愛佮人破豆開講兩句，一回生二回熟，逐家就呵lo2伊是「 六甲伯仔」。 聽阿爸講伊少年有一擺睏傷晏，欲牽牛去駛，佇半中途予阿公sang著，阿公看著，心光火著，就喊講，「啥人路啊，牛仔牽轉去。」 阿爸驚一下，三伐做兩伐，趕緊去園裡。