helenblog

50句（王秀容師） 1、（著、就、都） 阿弟仔勇甲一隻若牛，伊不時都講：「寒人食礤冰是上著時的好滋味。」據在阮按怎苦勸，伊就是無咧信篤。 2、（袂、未、覓、莫） 阿妹仔足急性，莫怪伊規透早一直問阿媽，菜頭粿炊熟未？阿媽 講：「阿妹仔，妳啖看覓。」阿妹仔講：「熟矣！毋過，足燒， 這馬猶袂當食。」 　 3、（佇、咧、佇咧、在） 阿兄佇門口埕咧拭阿公的鐵馬，才兩下手，就拭甲金鑠鑠！伊老神在在，佇咧聽候阿公來看。 4、（食、才、遮、遮爾） 老師共伊的外國朋友講：「阮臺灣遮，一四界的風景媠噹噹，物件 閣遮爾好食！恁逐家若無棄嫌，一定愛去耍看覓食看覓才著。」 5、（攏、都、就） 毋管你佇庄跤，抑是都市都攏看會著苦楝仔的跤跡。苦楝仔的樹葉佇寒人就落了了，干焦賰苦楝子掛佇樹頂。過年過，花開了，葉仔就閣發甲青青青。 6、（得、著、對、就） 搪著奇月日的25，阿妹仔就會去提發票來對號碼。若有著得伊就暢甲，若無著，伊就佇遐吐大氣，若消風的雞胿仔仝款。 7、（个、下、的、會） 阿母講：「遮的錢愛儉起來納下學期的註冊費。」伊閣講：「恁兩个攏會讀冊，愛閣較拍拚喔。」 8、（打、拍） 老師講：「莫佇打馬膠埕拍球，傷熱矣。」 9、（仔、啊、矣、抑） 熱人到矣，規條街仔路，毋管是果仔擔抑是飲料店，食涼的退火的，正港是窒倒街啊。 10、（閣、毋過、猶閣） 到今，疫情漸漸退去，毋過，坐捷運的人客猶閣喙罨掛牢牢，規條街路估行的，騎車的，駛車的，嘛是喙罨不離身。 11、（ 囡、囝） 阮是阿爸阿母的心肝仔囝，毋管是查埔囡仔抑是查某囡仔，in攏是惜命命。 12、（敢若、千焦、毋但） 老師講：「這擺敢若干焦兩、三組欲報名比賽，毋但參賽組別少，阮的贏面嘛誠大。」 13、（若、哪、那）， 今仔日，阿姐哪會歡頭喜面，那唱歌那跳舞，敢若有啥物好空的喔。 14、（偌、外） 阿媽叫我去外口看覓，雨落偌大？ 15、（欲、愛、要） 老師講：「欲食晝進前愛先洗手，食煞閣愛洗喙。逐家只要照起工做，就免驚會蛀齒矣。」 16 、（規、歸） 阿母講：「今仔日暗頓無夠米通煮飯，規氣咱來外口食當歸鴨肉冬粉。」 17、（遮、這、彼、遐） 阮遮是內田，作穡的， in彼是外海，掠魚仔的。 18、（哭、吼） 阿妹仔捙倒磅米芳，吼甲若咧霆雷公。聽著阿兄共安慰，伊才無閣哭。 19、（到、甲、佮、共） 過年若到，我佮阿嫂就會轉厝共阿媽鬥炊...

一條面巾 黃恬昕 阿媽捌共我講「一條面巾」的故事。 一百年前，台灣社會就真注重衛生，彼陣就有大摒掃的規定。 阿媽講：「有一擺大摒掃，規厝間的物件，攏愛搬出來外口，逐家摒甲大粒汗細粒汗。摒好的物件嘛囤甲一四界。 逐家攏足緊張，阿本仔大人連鞭欲來矣！眾人你一句我一句，厝裡大細項家私，自頭到尾閣點一遍，看有啥物物件落勾去無？ 雄雄，阿媽講，「今害矣，有一條面巾猶未提出來呢。」這聲悽慘矣！阿媽三步做兩步，趕緊去共彼條面巾提出來。 阿媽那想那講：「若想著欲走入去提彼條面巾，到今猶感覺心肝頭噗噗惝！」「阿本仔大人有夠歹，有夠惡，磕袂得就會予摃甲哀爸叫母。」阿媽講。 阿媽胸坎搭搭咧，講彼擺是「好米請著好人客」，好運搪著好人。伊講彼擺若像有影著巡查，嘛有可能警察有看著阿媽走入去房間內底，誠好佳哉大人無揣伊麻煩。 這馬，佇學校，學生囡仔攏有大摒掃，每一學期，上起碼愛大摒一、兩遍。台灣人的衛生習慣好，醫療水準懸，就親像這擺的疫情仝款，正港是世界有名，通人呵咾。

「共牛仔喝尿」是啥物意思？ 黃恬昕 按照華語的意思，是講「和美國『牛仔』一起喝尿」。 毋過，這無合理。 作穡人，牛隻是蓋要緊的資產。若像講好額人厝裡有開BMW抑是BENZ仝款的意思。作穡人共牛仔當做是厝裡的一份子，愛共牛仔的生活自頭到尾照顧甲足好勢。 暗時仔，牛仔攏愛牽入去伸手間仔的牛牢內底顧予好。欲牽入去牛牢內進前，愛先牽出去牛牢外口喝尿（噓尿）。有時陣，牛仔喝毋放尿，牛仔放尿佇牛牢內，規个牛牢內就淹大水喔！ 牛牢內淹水，愛緊去灶跤抔火烌燥水。庄跤人顧牛隻是若咧顧媠某仝款，牛牢內攏愛摒甲清清氣氣。 逐暗，愛牽牛仔出去牛牢外口喝尿，是作穡人逐工的工課。 所以，「逐暗，共牛仔牽出去牛牢外口噓尿」，才是「共牛仔喝尿」正解。 但是，話閣講轉來，咱若無受漢文字制約，直接用聲音來講，就是，「kā gû-á huah jiō」抑是「kā gû-á hoah jiō」就完全無這个問題矣。

共牛仔喝尿 黃恬昕 共(kā) 牛(gû) 仔(á) 喝(huah) 尿(jiō) 有一个朋友來阮兜𨑨迌。伊問我：「哪有人半暝咧喝，尿！尿！尿！」我共講：「這是咧共牛仔噓尿。」 作穡人，牛隻是蓋要緊的資產。若像講好額人厝裡有開BMW抑是BENZ仝款意思。作穡人共牛仔當做是厝裡的一份子，牛仔的生活自頭到尾，攏愛共照顧甲好勢好勢。 牛仔的糧草，愛隨時攢好。熱人庄跤足厚蠓，愛共牛仔做蠓仔薰。寒人無地割草，愛先探聽佗位有咧khè甘蔗，愛四界去抾蔗尾，閣載規牛車的蔗尾囤踮牛牢內，通予牛仔好過一个冬天。有時仔，若抾袂赴通予牛仔食，嘛愛佮寡仔番薯簽抑是煠豬菜。 若拄著牛隻破病、著痧，就愛閣煎藥草，好禮仔共牛仔灌食。阮兜田園較濟，拄著趕穡，牛仔的狀況攏愛保持一百分，一絲仔就袂使失覺察，致使飼牛仔的工課，袂使濫糝凊彩，厝裡的人不時神經攏愛繃足絚。 暗時仔，牛仔攏愛牽入去伸手間仔的牛牢內底顧予好。欲牽入去牛牢內進前，愛先牽出去牛牢外口喝尿（噓尿）。有時陣，牛仔喝毋放尿，牛仔若放尿佇牛牢內，規个牛牢內就淹大水喔！ 牛牢內淹水，愛緊去灶跤抔火烌燥水。阮細漢阿兄是負責摒牛牢的，見若拄著牛母（阮兜攏飼牛母）拉尿伊就足頭疼，因為彼工伊真有可能會上課遲到！庄跤人顧牛隻是若咧顧某仝款，牛牢內攏愛摒甲清清氣氣。 逐暗，共牛仔牽出去牛牢外口喝尿，是作穡人逐工的工課。

作穡人 黃恬昕 有一改，我陪阿爸去林口長庚回診。佇門診外口有真濟人咧聽候，逐家就那張等那開講破豆。 坐佇阮邊仔的，是一對頭毛白蔥蔥的老翁某。原來，這對翁某過去佇雲林咧飼蚶仔。這个阿伯才欲開始講爾爾，就講：「作穡人，透早做到透暗，會做做到袂做！話若欲講透支，目屎就掰袂離。」 聽彼的阿伯仔講不止仔濟伊學駛牛的故事。我才知影，原來駛牛的工課無輕可，毋是若咧食『麥當勞』遐爾簡單。伊講：「牛仔脾氣若來，據在你按怎共伊捽按怎共伊揲，伊毋行就是毋行，攏無伊的法。」阮阿爸佇邊仔，笑笑仔講：「駛牛的人，反應愛比牛仔較緊，才駛會行。」 阿爸自十外歲仔就開始學駛牛矣。聽著飼蚶仔的阿伯按呢講，阮才了解，阿爸佇外口予人呵咾「六甲伯仔」，原來毋是凊彩講講的。阮兜作六甲穡，拄著落種，阿爸的雙跤愛一直綴著牛隻耍田的速度，一區閣一區駛無停。 水田駛好，紲落播秧仔，掖肥，挲草，薅草，毒農藥，無一時清閒。做陸軍兵工班長的二兄，有一擺放假轉來厝，拄著園裡咧駛田。阿兄講，干焦駛鐵牛仔紡田，二十歲的少年兄就強欲擋袂牢矣，何況鐵牛紡完，愛閣踏牛耙。阿爸講：「作穡人攏愛看天公伯仔的面色，拄著好年冬才有好收成。」 有一擺，我佇福營圖書館門口，聽著兩个阿桑咧開講，講In厝裡做兩甲田，閣講，做穡是偌爾仔硬篤喔。我聽一下，心肝內想講：「作穡人，規年迵天攏無歇睏，毋過，六甲伯仔的艱苦有啥人知。」

阮兜有三隻牛 黃恬昕 阮兜有三隻牛，上勇的彼隻，就是阮阿爸。 我細漢捌佮一群囡仔出去耍，經過鹹水港大路的時陣，看到ㄧ个食酒的人倒佇稻草堆跤！我斟酌共看，唉喲！伊毋是別人，伊是阮阿爸呢！彼个時陣，我一直咧想，佇我的囡仔伴面頭前，為什麼阮阿爸是一个醉仙？為什麼阮阿爸佮別人的阿爸無仝款？毋是做老師的，毋是開賓士的頭家，嘛毋是穿西裝提公事包的工程師咧。彼陣我有夠歹勢。這馬，我大漢矣，嘛有年紀矣，才知影看代誌毋是遮爾簡單。 聽細漢阿姑講，自伊做囡仔有記持，厝裡已經作六甲穡，駛兩隻牛矣。彼當陣阿爸二十外歲。阿爸講，有一擺愛駛牛耙，毋過，伊透早煞睏傷晚。阿爸趕緊牽牛仔出門，䢢拄䢢半路搪著阿公。阿公誠受氣，大聲喝：「啥人路啊！ 牛仔牽轉去！」 聽著阿公遐爾歹聲嗽， 阿爸毋敢應話，共目屎擒咧，行大伐緊去園裡做工課。 佇外口，阿爸予人呵咾是「六甲伯仔」。 彼是伊自少年就訓練出來的好功夫。駛田播秧仔愛趕節氣，阿爸跤手猛掠， 駛牛的手勢好，反應緊。伊講，家己的田駛好，伊嘛會去共叔公仔in鬥駛牛。 阿爸佇公學校讀三年四個月，做兵的時陣是做傳令兵，送公文。公學校讀無煞，留佇厝裡作穡。阿爸捌講，十外歲仔，伊捌去掘甘蔗，大大粒的蔗頭一下仔就挖起來矣。佇遐削甘蔗根的查某人講：「猴囡仔，遮爾有擋頭，規粒（甘蔗的）葫蘆仔頭攏拚起來矣。」 阿爸自細漢就膽頭真在。阿媽講，有一擺，阿爸綴伊去水利所。阿爸看著水利所彼隻狗仔誠古錐，一直佮彼隻狗仔耍，攏袂驚生份。阿媽佇邊仔，看一下驚甲咇咇掣！阿爸講：「驚驚袂著等。做工課愛猛醒，毋通死酸慢趖。」 阿爸十外歲，戰後無偌久，拄著寒熱病仔 (瘧疾)流行。可能小可仔傷著伊的頭殼，致使伊講話無通像咱平常人遮爾好勢，有當時仔，伊欲表達的意思袂當予人足了解。毋過，伊的心肝是比豆腐閣較柔軟。 伊留佇庄跤，自少年就綴佇阿公的身軀邊作穡。伊先娶阿母入門鬥做工課，才去做兵。伊對待厝內的兄弟姐妹無計較，伊照起工作穡，陪伴序大人，予兄弟姐妹佇外口會當安心拍拚事業，毋免掛心。阿爸四十七歲，不幸家後過身。這个苦情一時無法度排解，只好借酒解憂愁，借酒敨放心肝頭的鬱卒。有時陣，伊煞感覺伊的付出，換來的敢真正像伊講的「我是細姨仔生的。」 阿爸在生所受的壓力，因為啉酒，煞不時咧受傷。造成伊六、七十歲了後有血糖佮血壓的問題。七十五歲了後，慢慢有腦部退化，老人失智的症頭。八十歲...

偷挽菝仔 黃恬昕 阮細漢逐不時都真枵饞，有時陣，三頓食飽猶是愛揣物件窒喙空。 論真來講，阮嘛毋是規工食飽閒仙仙去共人tsuî 菝仔。其實，彼是阮兩三工就愛出去割牛草，就會順紲挽菝仔罔啖糝。 牛草一下割煞，若拄著菝仔熟矣，抑是主人家當咧睏中晝，看看咧四邊攏無人，阮就順手牽羊，共菝仔挽來食。 這欉菝仔拄好生佇鴨寮仔的水池仔邊，普通普通大欉。平常時仔無人照顧，毋過，菝仔粒嘛生甲不止仔厚。你共正爿倒爿頂懸下跤四界相相巡巡咧，總有幾粒仔較熟的會當挽起來食。 囡仔人重食，若無菝仔欲按怎？阮就會想空想縫揣物件來食。西北雨一停，草埔內底就有足濟露螺通抾去賣，買物食。有當時仔，路裡嘛有人擲討捔的銅管仔通抾，上無嘛會當換兩粒糖仔罔含。 細漢佇庄跤，攏有古物商會捒一台車仔，一四界巡邏咧收歹銅舊錫。阮共厝裡歹去的農具抑是抾來的歹鐵仔提予伊，伊就會捲一卷大大卷的麥芽膏換你。 細漢囡仔當咧大閣gâu食。毋過，序大人規工咧無閒做工課，嘛無閒管遐濟。這馬想起來，偷挽菝仔，煞成做庄跤囡仔心適的記持。

講鬥句，學閩南語 黃恬昕 過年新正，新學級拄開始。閩南語課，我予學生囡仔看閩南語唸歌，≪唸啥物歌≫。這是舊年拄過身的人間國寶--楊秀卿藝師，佮伊的藝生儲建智翁某講的故事，〈李哪吒大鬧東海龍王〉。這个影片是in佮「虎尾科技大學」合作，閣衝對外國去，著德國的「紅點設計大獎」。 除了低年級有的囡仔先備智識較欠缺，有的煞講誠無聊以外；中，高年級學生攏看甲蓋歡喜！因為唸歌自頭到尾攏有鬥句，影片有圖有字閣心適，囡仔反應誠好。 看煞，我用一寡仔時間來共囡仔解說。台灣唸歌，用閩南語，用七字仔，用月琴佮大廣絃仔伴奏，那唸那唱，伊對古早時代的明朝，四，五百年前就有矣。論真來講，唸歌藝術來到台灣社會，經過遮濟時間，已經成做台灣這塊土地特殊的藝術矣。 講鬥句是過去台灣人講話的慣習。首先，我對阮阿媽講起。阿媽毋捌字。有一擺，我嫌講：「阿媽，厝裡的樹欉佮花栽哪攏無開花？」阿媽聽著，隨應講：「戇孫仔，花無百日紅，人無千日好。」 以早，拄著年仔節仔，攏愛家己刣雞刣鴨。我看著阮阿母共雞仔掠咧，那掣雞頷頸毛閣那唸，講：「做雞做鳥無了時，緊緊去別位出世，出世好額人囝兒。」 若是媒人婆講鬥句就愈厲害矣。親情做成，就愛講：「新郎新娘雙雙閣對對，囝囝孫孫萬年大富貴。」新郎來敬酒，愛講：「燒酒啉予焦焦焦，祝你明年做阿爸。」新娘敬茶，著愛講：「食茶食甲甜甜甜，予你明年生後生。」 講鬥句學閩南語，較緊，閣較心適。

媠䆀 黃恬昕 台北市保安宮配祀註生娘娘， 有一副對聯： 註果註因美惡憑天賦與 生男生女早遲由我推排 上聯「美惡」，應當是閩南語「媠䆀」。以前，無閩南語專用詞，嘛無講華語，攏使用漢字。 若共「美惡」改做「媠䆀」，字義較準，平仄有合，朗讀嘛加較順。

駛牛車 黃恬昕 我讀國中的時，有一工，阿爸鐵牛仔紡了，欲共鐵牛駛轉去，伊叫我共園裡的牛車駛轉去厝。 我雄雄聽一下，煞毋知是欲吼抑是欲笑，想講敢是家己幻聽，聽了重耽去。我越頭閣四箍輾轉看看咧，毋過，彼个時空，除了我佮阿爸，無第三人呢！ 「無剉，規欉好好。」都是我愛共牛車駛轉厝。 這聲代誌大條囉！駛牛車的農路遐爾狹，兩爿面的水道，一爿是深深深閣闊闊闊的大圳溝，一爿嘛是著水區當咧淹水的水圳仔。這久，雙爿水道攏滇滇滇閣足掣流的。 駛過這條農路，牛車就愛tshuánn過鹽水港大路，大路頂的汽車車來車去，彼才是大考驗。阮兜的牛仔脾氣䆀閣厚性地，這擺，伊若毋聽我的，我是欲按怎。 這馬，我已經袂記得家己按怎坐起去牛車頂，閣好禮仔喝牛仔起行。駛過農路，人落來聽候兩爿面來車，等無車才過大路。駛過來車路這爿，你若淺想講，已經安心矣，你就錯囉。 牛車駛佇大路頂直行兩三百公尺，就愛正斡，啊這毋是佮桌頂拈柑仝款。錯！你愛細膩仔khau大輾，才袂挵著交通號誌柱仔，猶毋過「千金難買早若知」。這的時陣，彼个號誌已經予牛車挨一下糜糜卯卯矣。 牛車駛轉來厝了後，我就假講欲緊去寫字。過無偌久，阿爸轉來，就問講，是啥人共彼支交通號誌挵挵倒？我恬恬無敢講。