駛牛車 黃恬昕 我讀國中的時，有一工，阿爸鐵牛仔紡了，欲共鐵牛駛轉去，伊叫我共園裡的牛車駛轉去厝。 我雄雄聽一下，煞毋知是欲吼抑是欲笑，想講敢是家己幻聽，聽了重耽去。我越頭閣四箍輾轉看看咧，毋過，彼个時空，除了我佮阿爸，無第三人呢！ 「無剉，規欉好好。」都是我愛共牛車駛轉厝。 這聲代誌大條囉！駛牛車的農路遐爾狹，兩爿面的水道，一爿是深深深閣闊闊闊的大圳溝，一爿嘛是著水區當咧淹水的水圳仔。這久，雙爿水道攏滇滇滇閣足掣流的。 駛過這條農路，牛車就愛tshuánn過鹽水港大路，大路頂的汽車車來車去，彼才是大考驗。阮兜的牛仔脾氣䆀閣厚性地，這擺，伊若毋聽我的，我是欲按怎。 這馬，我已經袂記得家己按怎坐起去牛車頂，閣好禮仔喝牛仔起行。駛過農路，人落來聽候兩爿面來車，等無車才過大路。駛過來車路這爿，你若淺想講，已經安心矣，你就錯囉。 牛車駛佇大路頂直行兩三百公尺，就愛正斡，啊這毋是佮桌頂拈柑仝款。錯！你愛細膩仔khau大輾，才袂挵著交通號誌柱仔，猶毋過「千金難買早若知」。這的時陣，彼个號誌已經予牛車挨一下糜糜卯卯矣。 牛車駛轉來厝了後，我就假講欲緊去寫字。過無偌久，阿爸轉來，就問講，是啥人共彼支交通號誌挵挵倒？我恬恬無敢講。