講鬥句，學閩南語 黃恬昕 過年新正，新學級拄開始。閩南語課，我予學生囡仔看閩南語唸歌，≪唸啥物歌≫。這是舊年拄過身的人間國寶--楊秀卿藝師，佮伊的藝生儲建智翁某講的故事，〈李哪吒大鬧東海龍王〉。這个影片是in佮「虎尾科技大學」合作，閣衝對外國去，著德國的「紅點設計大獎」。 除了低年級有的囡仔先備智識較欠缺，有的煞講誠無聊以外；中，高年級學生攏看甲蓋歡喜！因為唸歌自頭到尾攏有鬥句，影片有圖有字閣心適，囡仔反應誠好。 看煞，我用一寡仔時間來共囡仔解說。台灣唸歌，用閩南語，用七字仔，用月琴佮大廣絃仔伴奏，那唸那唱，伊對古早時代的明朝，四，五百年前就有矣。論真來講，唸歌藝術來到台灣社會，經過遮濟時間，已經成做台灣這塊土地特殊的藝術矣。 講鬥句是過去台灣人講話的慣習。首先，我對阮阿媽講起。阿媽毋捌字。有一擺，我嫌講：「阿媽，厝裡的樹欉佮花栽哪攏無開花？」阿媽聽著，隨應講：「戇孫仔，花無百日紅，人無千日好。」 以早，拄著年仔節仔，攏愛家己刣雞刣鴨。我看著阮阿母共雞仔掠咧，那掣雞頷頸毛閣那唸，講：「做雞做鳥無了時，緊緊去別位出世，出世好額人囝兒。」 若是媒人婆講鬥句就愈厲害矣。親情做成，就愛講：「新郎新娘雙雙閣對對，囝囝孫孫萬年大富貴。」新郎來敬酒，愛講：「燒酒啉予焦焦焦，祝你明年做阿爸。」新娘敬茶，著愛講：「食茶食甲甜甜甜，予你明年生後生。」 講鬥句學閩南語，較緊，閣較心適。