共牛仔喝尿 黃恬昕 共(kā) 牛(gû) 仔(á) 喝(huah) 尿(jiō) 有一个朋友來阮兜𨑨迌。伊問我：「哪有人半暝咧喝，尿！尿！尿！」我共講：「這是咧共牛仔噓尿。」 作穡人，牛隻是蓋要緊的資產。若像講好額人厝裡有開BMW抑是BENZ仝款意思。作穡人共牛仔當做是厝裡的一份子，牛仔的生活自頭到尾，攏愛共照顧甲好勢好勢。 牛仔的糧草，愛隨時攢好。熱人庄跤足厚蠓，愛共牛仔做蠓仔薰。寒人無地割草，愛先探聽佗位有咧khè甘蔗，愛四界去抾蔗尾，閣載規牛車的蔗尾囤踮牛牢內，通予牛仔好過一个冬天。有時仔，若抾袂赴通予牛仔食，嘛愛佮寡仔番薯簽抑是煠豬菜。 若拄著牛隻破病、著痧，就愛閣煎藥草，好禮仔共牛仔灌食。阮兜田園較濟，拄著趕穡，牛仔的狀況攏愛保持一百分，一絲仔就袂使失覺察，致使飼牛仔的工課，袂使濫糝凊彩，厝裡的人不時神經攏愛繃足絚。 暗時仔，牛仔攏愛牽入去伸手間仔的牛牢內底顧予好。欲牽入去牛牢內進前，愛先牽出去牛牢外口喝尿（噓尿）。有時陣，牛仔喝毋放尿，牛仔若放尿佇牛牢內，規个牛牢內就淹大水喔！ 牛牢內淹水，愛緊去灶跤抔火烌燥水。阮細漢阿兄是負責摒牛牢的，見若拄著牛母（阮兜攏飼牛母）拉尿伊就足頭疼，因為彼工伊真有可能會上課遲到！庄跤人顧牛隻是若咧顧某仝款，牛牢內攏愛摒甲清清氣氣。 逐暗，共牛仔牽出去牛牢外口喝尿，是作穡人逐工的工課。