50句（王秀容師） 1、（著、就、都） 阿弟仔勇甲一隻若牛，伊不時都講：「寒人食礤冰是上著時的好滋味。」據在阮按怎苦勸，伊就是無咧信篤。 2、（袂、未、覓、莫） 阿妹仔足急性，莫怪伊規透早一直問阿媽，菜頭粿炊熟未？阿媽 講：「阿妹仔，妳啖看覓。」阿妹仔講：「熟矣！毋過，足燒， 這馬猶袂當食。」 　 3、（佇、咧、佇咧、在） 阿兄佇門口埕咧拭阿公的鐵馬，才兩下手，就拭甲金鑠鑠！伊老神在在，佇咧聽候阿公來看。 4、（食、才、遮、遮爾） 老師共伊的外國朋友講：「阮臺灣遮，一四界的風景媠噹噹，物件 閣遮爾好食！恁逐家若無棄嫌，一定愛去耍看覓食看覓才著。」 5、（攏、都、就） 毋管你佇庄跤，抑是都市都攏看會著苦楝仔的跤跡。苦楝仔的樹葉佇寒人就落了了，干焦賰苦楝子掛佇樹頂。過年過，花開了，葉仔就閣發甲青青青。 6、（得、著、對、就） 搪著奇月日的25，阿妹仔就會去提發票來對號碼。若有著得伊就暢甲，若無著，伊就佇遐吐大氣，若消風的雞胿仔仝款。 7、（个、下、的、會） 阿母講：「遮的錢愛儉起來納下學期的註冊費。」伊閣講：「恁兩个攏會讀冊，愛閣較拍拚喔。」 8、（打、拍） 老師講：「莫佇打馬膠埕拍球，傷熱矣。」 9、（仔、啊、矣、抑） 熱人到矣，規條街仔路，毋管是果仔擔抑是飲料店，食涼的退火的，正港是窒倒街啊。 10、（閣、毋過、猶閣） 到今，疫情漸漸退去，毋過，坐捷運的人客猶閣喙罨掛牢牢，規條街路估行的，騎車的，駛車的，嘛是喙罨不離身。 11、（ 囡、囝） 阮是阿爸阿母的心肝仔囝，毋管是查埔囡仔抑是查某囡仔，in攏是惜命命。 12、（敢若、千焦、毋但） 老師講：「這擺敢若干焦兩、三組欲報名比賽，毋但參賽組別少，阮的贏面嘛誠大。」 13、（若、哪、那）， 今仔日，阿姐哪會歡頭喜面，那唱歌那跳舞，敢若有啥物好空的喔。 14、（偌、外） 阿媽叫我去外口看覓，雨落偌大？ 15、（欲、愛、要） 老師講：「欲食晝進前愛先洗手，食煞閣愛洗喙。逐家只要照起工做，就免驚會蛀齒矣。」 16 、（規、歸） 阿母講：「今仔日暗頓無夠米通煮飯，規氣咱來外口食當歸鴨肉冬粉。」 17、（遮、這、彼、遐） 阮遮是內田，作穡的， in彼是外海，掠魚仔的。 18、（哭、吼） 阿妹仔捙倒磅米芳，吼甲若咧霆雷公。聽著阿兄共安慰，伊才無閣哭。 19、（到、甲、佮、共） 過年若到，我佮阿嫂就會轉厝共阿媽鬥炊粿，毋免予阿媽無閒甲攏無歇睏。 20、（做、作、造） 導遊講：「這座吊橋是過去一个大善人起作的。伊造橋鋪路毋但用愛心做好代，嘛造福千代萬代的囝孫。」 21、（免、無、毋、莫、不） 三年疫情的期間，發生誠濟代誌，沓沓滴滴，無所不至，莫此為甚。這馬已經漸漸解封了，嘛毋免掛喙罨矣。 22、（袂、未） 阿媽講：「肉粽猶未熟，袂使掀鼎蓋。」 23、（丸、圓） 彰化寶斗的肉圓上出名；嘉義布袋的虱目魚丸是通人知。 24、（上、尚、足、誠） 今仔日，阿姐佇學校有上課佮表演跳舞，伊穿甲誠媠，閣足高尚的。 25、（上、尚、蓋、界） 全世界上蓋高尚的產業就是愛地球，惜土地的綠色產業。 26、（甲、佮、蓋、較） 阿明佮阿華歡喜甲，閣鼓舞人加入球隊。in講：「運動上蓋著時，運動予咱的身體較勇健。」 27、（土、塗） 阿母講：「咱這塊土地的塗質足好。」 28、（各、個、个、的、咧） 這個月月底，學校有辦一个無塑的愛心園遊會活動，這馬阮班每一組攏咧做in各別的宣傳海報。 29、（假若、干焦、甲若、敢若） 阿弟仔假若伊無偷食薰，講伊干焦看人食。講甲若真的仝款，毋過，敢若無人欲相信伊。 30、（兩、二） 阮兩个攏是二月出世的。 31、（歹、䆀、害、壞） 阿母講：「媠䆀是爸母生成，上蓋害的是去學歹，終其尾，家庭破壞了了。」 32、（這馬、這嘛、即、這） 老師講：「後禮拜六園遊會欲到矣，咱著愛即時分配工課。」伊閣講：「這是一擺學習的好機會，這嘛是難得的機會，這馬，開始動工。」 33、（講、說） 林講師真有耐心，伊聊聊仔說明資訊安全的基本操作，自頭到尾講甲足詳細的，逐家攏聽甲耳仔覆覆覆。 34、（翁、尪） 這對翁某講：「臺仔上的女主角袂輸仙女下凡，伊的尪仔面媠噹噹。」 35、（小可仔、一寡仔） 阿爸講：「逐家小可仔較拚勢咧, 這逝薅了就賰毋成物矣，連鞭就好收工囉。」 36、（猶閣、又閣、閣、毋過、毋閣） 今年，台灣足欠水，毋過，下晡開始落雨矣。雨勢一陣閣一陣，停一下就又閣開始潑雨。氣象報告講：「大雨猶閣會落兩三工。」毋閣（毋過），阮向望天公伯仔沓沓仔落，毋通落傷雄。 37、（抑、也、猶、啊、又） 極端氣候所致，連鞭洘 岸啊連鞭又閣做大水。有時欠水，抑有時淹水，一四界猶有真濟災情，敢講這也是無可奈何的代誌。 38、（逐家、大家、逐个） 逐个新婦攏上台共in大家獻花，落尾手，逐家才做伙翕相留影。 39、（阮、咱、阮的、咱的） 阮阿爸阿母是阮的（阿爸佮阿母）， 咱阿公阿媽是咱的（阿公佮阿媽）。 40、（的、矣） 阿叔共我欲挃的日本布尪仔買到矣。 41、（紲，煞、綴） 阿媽講：「恁姐妹仔暗頓食煞，愛紲手共碗箸洗洗咧，毋通予恁阿嫂綴佇後壁收尾，足忝的。」 42、（拼、拚、摒） 阮老師講：「逐家先打拚摒掃，做完，才閣耍拼音遊戲。」 43、（凡勢、範勢） 阿媽講：「看這號範勢，凡勢會落雨，阮趕緊來轉。」 44、（柴、材、才） 阿公講：「松梧是上材，袂漚袂臭，伊閣有柴木天然的香氣，才是真稀罕。」 45、（臺、台） 阿弟仔騎一臺台灣製造的鐵馬。 46、（徛、倚） 一隻足大大隻的徛鵝停佇水池仔邊，咧佮遊客做伙翕相。 47、（緊、快、絚） 阿明參加走標比賽的時，鞋帶縛無絚，鞋仔煞那走那落。伊緊停落來縛予好，才閣快速衝對終點去。 48、（啊、矣、抑） 是欲讀高中抑是欲讀高職，阿姐考慮誠久！好佳哉阿爸阿母共伊開破了後，伊就清醒矣。這馬，伊知影有一把功夫就毋免煩惱食穿啊。 49、（才、遮、毋食、毋才） 阿母行來灶跤，共阮講：「厝裡遮的毋食的物件，愛倒潘桶予豬仔食，毋才袂浪費，這才是敬愛天地的好步數。 50、（和、佮、甲） 我佮阿文喙笑目笑，講：「咱兩百箍買這臺舊型的DELL筆電，俗甲有賰，誠會和。」