阮兜有三隻牛 黃恬昕 阮兜有三隻牛，上勇的彼隻，就是阮阿爸。 我細漢和一陣囡仔佇外口耍，經過鹹水港大路，哪會有ㄧ个食酒的倒佇稻草堆跤，我目睭展大蕊斟酌共看，哎喲喂，伊毋是別人，伊是阮阿爸！我不時咧想，佇遐的囡仔伴面頭前，是按怎阮阿爸是一个醉仙? 是按怎阮阿爸佮別人的阿爸無仝，‘’毋是做老師的，毋是開賓士的頭家，嘛毋是穿西米勒提公事包的工程師。‘’到今，我有歲矣，才知影看代誌毋是遮簡單。 聽細漢阿姑講，自伊細漢，厝裡就作六甲穡，駛兩隻牛。彼陣阿爸二十歲外歲。阿爸講，有一擺愛駛牛，無張持睏ㄧ下傷晏，半路予阿公tsang著。阿公大聲喝：「啥人路啊，牛仔牽轉去!」 阿爸目屎擒咧，行大伐，緊去田裡做工課。 佇外口，阿爸予人呵咾「六甲伯仔」。伊自少年做到老，駛田播稻仔愛搶時間，趕節氣。常在‘’家己做無夠，閣做別人的來鬥。‘’阿爸少年的時陣會去共叔公仔in鬥駛牛。 阿爸公學校讀三年四個月，做兵的時做傳令兵，送公文。公學校讀無煞，佇厝內作穡。阿爸十外歲去掘甘蔗，大大粒的蔗頭一下仔就挖起來矣。佇遐削蔗根的查某人就講：「猴囡仔，有夠gau5，規粒葫蘆仔頭一睏仔就拚起來矣！」 阿爸自細漢膽頭誠在。阿媽講，有一擺伊去水利所揣人，阿爸嘛綴去。阿爸看到大人(警員)彼隻狗仔囝足古錐，攏袂驚生份，做伙佮狗仔耍袂煞，阿媽佇邊仔看著，嘛喊伊袂煞。阿爸常在講，‘’驚驚袂著等‘’。伊駛牛的手勢好，若準你反應傷慢，牛仔就駛袂行矣。 戰後，阿爸十外歲，拄著瘧疾(冷熱病)流行，有傷著頭殼。伊講話無像咱遮好勢，有時陣，‘’講時遲，彼時快。‘’伊欲講的話實在予人sa無摠。毋過，伊的心肝比豆腐較軟。 阿爸自少年就恬恬做，娶阿母入門，了後伊才去做兵。伊對厝裡大大細細無計較，照起工作穡，奉待序大人，予兄弟姊妹逐家佇外口會當安心拍拚事業。 阿爸四十七歲，家後過身。濟濟的壓力一直teh佇伊的肩胛頭無法度排解，干焦會當借酒解愁，借酒敨放心內的鬱卒。伊的付出，換來的，敢真正像伊講的，‘’我是細姨仔生的?‘’ 阿爸在生遭受壓力，伊不時lim酒，不時出酒，六、七十歲，血糖佮血壓較懸；七十五歲了後，腦部退化，有老人失智的症頭，八十歲，腦部的問題那來那嚴重，嘛袂認得人矣。 阿爸，這馬你做仙矣，你愛萬念放下，一心念佛，去一個無分別，無病苦，無煩惱的西方淨土。阿彌陀佛。