鴨母寮的故事1

啊，我無共阿媽煮飯！ 細漢戇想，毋知時間寶貴。 tshit迌規工無張無持就黃昏暗矣，遠遠佇門口埕外面（廟前），阿公阿媽已經駛牛車轉來矣。 愈想愈見笑，我哪不時袂記持共阿媽鬥煮飯，到底有幾擺是會記得的，敢有兩、三遍？ 心肝頭有講袂出的歹勢和遺憾，我到底咧無靠啥？敢有影規工咧做功課？照顧小妹？抑是顧看電視顧看閒冊？ 彼陣有夠實頭！哪袂曉寫清單，一項一項按表抄課，聊聊仔來就好。 閣較想袂到的是，阿媽規工做工課，已經忝甲會呼雞袂pun5火，伊毋但毋bat講半句話，嘛毋bat罵過我。