helenblog

鴨母寮故事3 --花無百日紅，人無千日好（阿媽） 來台北讀冊，曾經佇麥教授的所在生活一段時間，學會曉蒔花種草。 阿爸六十歲，家己自動申請退休，佇庄跤陪伴阿媽。這陣，有人kuann7洋蘭、蝴蝶蘭來，我若轉去就鼓舞阿爸騎oo-to2-bai2 去樸仔跤買寡焦海草和花肥。 阿爸無聊，會鬥做剪枝、徙栽和沃水的工課，上有規模，bat種甲兩三排，花有紅的、黃的、粉色的，看起來阿爸閣不止仔有園藝的sense。 蘭花愛涼爽、焦鬆的環境，曬日是早起時仔的日光較好，一tsang5一tsang5古錐迷人的款，看是適應，了袂bai2。 毋過，若是無tu2好，節氣毋著，干焦有phu2-phu2的青葉仔罔聞芳，看著真厭氣。想袂到，這e5時陣，阿媽隨接咧講，gong7孫，“花無百日紅，人無千日好”。年歲過半百，才了解阿媽的話：人生的路途，若像海上波浪有時起有時落，kai3在咱是毋是會當認真拍拚，把握時機，創造美滿的未來。

鴨母寮故事--內底田賣去矣 大兄欲娶大嫂入門。 這是德仔家外媽做的親情，彼陣，大兄二十八歲，我讀高中。 娶新婦著thai5雞倒羊，tshuan5媒人錢和聘金禮。國一彼冬娶二嫂，阿母共農會貸款借錢；這擺，阿爸賣內底田。 事過境遷，到今，二兄和我猶原無了解，阿爸賣這khu田，阿公哪無講話咧？到底是啥物緣故？二兄毋知，大兄敢知，有啥人知影原因咧？ 這是二兄提出的疑問，我會記得，當時感覺足毋甘，吼幾若擺，因為，佇彼khu園有足濟和序大人相處的點點滴滴。

啊，我無共阿媽煮飯！ 細漢戇想，毋知時間寶貴。 tshit迌規工無張無持就黃昏暗矣，遠遠佇門口埕外面（廟前），阿公阿媽已經駛牛車轉來矣。 愈想愈見笑，我哪不時袂記持共阿媽鬥煮飯，到底有幾擺是會記得的，敢有兩、三遍？ 心肝頭有講袂出的歹勢和遺憾，我到底咧無靠啥？敢有影規工咧做功課？照顧小妹？抑是顧看電視顧看閒冊？ 彼陣有夠實頭！哪袂曉寫清單，一項一項按表抄課，聊聊仔來就好。 閣較想袂到的是，阿媽規工做工課，已經忝甲會呼雞袂pun5火，伊毋但毋bat講半句話，嘛毋bat罵過我。

昨昏和壽仁去士林慈諴宮拜拜。 媽祖廟佇夜市仔內底，是1796年（清國嘉慶元年）起的。毋過，1859年（咸豐九年）漳泉拚鬥，舊廟燒去，士紳潘永清佇八芝蘭新街重建，所以，士林媽祖也叫新街媽祖。 主神媽祖婆，另外，廣澤尊王（泉州人原鄉信仰），道教祖師張天師（道陵），玄天上帝，註生娘娘，城隍老爺與福德正神，功德堂有服侍地藏王菩薩和歷屆主任委員。 日本時代慈諴宮曾經做八芝蘭公學校分教場（今士林國小），士林信用組合辦公室（今士林農會），是集合宗教、教育和經濟一體的信仰中心。1954年，廟前起三座並排戲臺，全台灣獨一無二。2015年，廟後空地起造後殿（文史館）和辦公廳。 慈諴宮、舊街神農宮和芝山巖惠濟宮是士林三大廟。2001年，慈諴宮大規模古蹟整修，其中四季平安浮雕、清國石獅和龍柱，典雅古樸。日本時代，有正殿的交趾燒、木雕對場作、木雕結構、正殿竹葉詩、祈求吉慶堵，作工幼膩。戰後，有戲臺、門神、神龕木雕，精彩大範。 慈諴宮廟身建築年前久遠，多次重修，猶原保存古意。近來社會經濟水準提昇，管理當局囥袂少政治人物的碑刻、牌匾和石雕，予人感覺廟前空間複雜，加上媽祖廟佇士林夜市內，予周圍非法攤仔位包圍，漸漸失去大廟的恢宏開闊。